नाशिकच्या शिरपेचात मानाचा तुरा! नॅशनल टेस्टिंग एजन्सीने (National Testing Agency) जाहीर केलेल्या यंदाच्या जेईई मेन्स निकाल (JEE Mains Result) मध्ये नाशिकच्या विद्यार्थ्यांनी गगनभरारी घेतली आहे. ओजस उपासनीसह तब्बल 57 विद्यार्थ्यांनी 99 पर्सेटाईलचा टप्पा पार करत यशाचे शिखर गाठले असून, या निकालाने संपूर्ण जिल्ह्यात आनंदाचे वातावरण आहे. 13 लाखांहून अधिक विद्यार्थ्यांच्या स्पर्धेत नाशिकच्या लेकरांनी मारलेली ही बाजी नेमकी कशी आहे आणि टॉपर्सची यादी काय सांगते, पाहूया सविस्तर…
नॅशनल टेस्टिंग एजन्सी (National Testing Agency) द्वारे जानेवारी सत्रात घेतलेल्या बहुप्रतिक्षित जेईई मेन्स निकाल (JEE Mains Result) सोमवारी सायंकाळी उशिरा ऑनलाइन पद्धतीने जाहीर करण्यात आला. या परीक्षेत नाशिकच्या विद्यार्थ्यांनी आपले वर्चस्व सिद्ध करत घवघवीत यश मिळविले आहे. विशेषतः नाशिकचा विद्यार्थी ओजस उपासनी याने 283 गुण मिळवत 99 पेक्षा अधिक पर्सेटाईल मिळवल्याने त्याचे सर्वत्र कौतुक होत आहे.
देशपातळीवर 13 लाखांहून अधिक विद्यार्थ्यांची उपस्थिती
यावर्षी जानेवारी सत्रात झालेल्या जेईई मेन्सच्या पेपर क्रमांक एकसाठी देशभरातून तब्बल 13 लाख 55 हजार 293 विद्यार्थ्यांनी नोंदणी केली होती. त्यापैकी 13 लाख 4 हजार 653 विद्यार्थ्यांनी प्रत्यक्ष परीक्षा दिली. नॅशनल टेस्टिंग एजन्सीने ही परीक्षा एकूण 13 भाषांमध्ये घेतली होती. या परीक्षेच्या निकालात देशातील फक्त 12 विद्यार्थ्यांनी 100 पर्सेटाईल गुण मिळवले असून, त्यात महाराष्ट्रातील एकमेव माधव विराडिया या विद्यार्थ्याचा समावेश आहे.
एलन नाशिकच्या विद्यार्थ्यांचे उल्लेखनीय यश
नाशिकमधील ‘एलन’ (Allen) करिअर इन्स्टिट्यूटच्या विद्यार्थ्यांनी या निकालात आपली छाप पाडली आहे. एलन नाशिकचे सेंटर प्रमुख शशी शंकर सिंह यांनी दिलेल्या माहितीनुसार, एकट्या एलन नाशिकमधील 57 विद्यार्थ्यांनी 99 पेक्षा अधिक पर्सेटाईल गुण मिळवून इतिहास रचला आहे. यामध्ये ओजस उपासनी याने 283 गुणांसह अव्वल स्थान पटकावले आहे. तसेच गौरव, चिन्मय, पार्थ, परम, करण, कृष्णा आणि प्रखर या विद्यार्थ्यांनीही 99+ पर्सेटाईल मिळवत उल्लेखनीय कामगिरी केली आहे.
ज्या विद्यार्थ्यांनी या परीक्षेत उत्तम गुण मिळवले आहेत, ते आता आयआयटी (IIT) प्रवेशासाठी आवश्यक असलेल्या ‘जेईई ॲडव्हान्स्ड’ (JEE Advanced) परीक्षेच्या तयारीला लागतील. तसेच, ज्या विद्यार्थ्यांना आपल्या गुणांमध्ये अधिक सुधारणा करायची आहे, त्यांच्यासाठी एप्रिल महिन्यात जेईई मेन्सचे दुसरे सत्र आयोजित केले जाणार आहे. नाशिकच्या या यशाने शिक्षण क्षेत्रात आनंदाचे वातावरण असून यशस्वी विद्यार्थ्यांवर अभिनंदनाचा वर्षाव होत आहे.
